Neu bei LAIM-online: Die Kolumne vom Laimer Mariandl

Hallo, ihr do draus'n in Loam un Umgebung. I mechad mi bei Eich a moi vorstein. I bin des Mariandl. Bin scho seit 20 Johr in Loam. Bin in Minga in der Au geborn un hob an Hoizkirchner gheirat. Zwoa Kinda hob i a grous zong. Die oane is scho verheirad un hod seiba zwoa Kinda und mei gloa, naja die pubert no a zeitlang rum. Aba a des gibt si mid da Zeid. Zum Glück muas do a jeda duach, der seiba Kinda hod.
Aba des is a andas Thema.

In Laim wohn i gern und do bleib i a. Wenn Ihr mia sogz wo da Schua drugt, nacha hob i a Ohr fia Eich offa. Eiso riatz Eich bei mia. I geh mit Euch durch Dick und Dünn. Des back ma scho. Mia kenna mitananda schimpfa und a jede Menga Spaß hom.

Steiz Eich a moi vor. Jetz wo d Ferien boid los genga, do streigas scho. De Lufthansa hod woi zfui Geid. Ma soid vielleid mim Zug fahn. Oda no bessa, bleibtz dahoam. Den do is oiwei am schenst'n.

Nadürlich gibt's do schene Sachan wos'd macha konnst. Mia hom fui Biergärd'n un an haufa Baggaseen. Oda moi in Tierpark. De Rindficha gfrein si a üba jed'n Bsuach.

Zur Zeit is no däs Magdalenenfest beim Hirschgart'n. A zünfdige Blosmusi a Maß Bier und a guade Brodzeit. Ja wos wui ma mehr? Klar is fia de gloana Zämbal a wos dabei. Nur da Baba oda Mam muas an grous'n Geidbeidl midbringa. Do gibds Karusei zum fahn oder a Schiasbud'n . Einfach nur Spaß ham. Außerdem ko ma endli a amoi de schene Dracht aus'm Schank hoin, damid de Dracht a moi wieda an Ausgang griagd. Fesch werd's ausschaung damid. Un wer des Magdalenenfest ned so gern hod un liaba auf wos oids städ, der geht hoid aufd Auaduid. De Jakobiduid is a no di Wocha. Do san hoid a Ständln mid Geschirr, Gwand, Andiquidäd'n wos zum nasch'n un fui nüzlich's zeig. Wos ma vielleichd braucha ko.

Einfach mo hi schaung ob's oan daugd oda ned. Is ja Gschmagssach. Aba wers ned brobierd kos ned song.

No wos, weas a bissal überdrim hod und der Schädl am nächsd'n Dog ned so mog, wias on seiba liab wä, nacha machds hod a gscheide Koderbrodzeid. Mid Essiggurg'n, Bismarkhäring und a Asbirin. Nacha werd des scho wida. Ja, so a Koda wui ja a moi pflegd sei.

In dism Sinn no an schena Dog. Aba boid sog i Eich no an andän Tipp. Nur ned heid. Den a bissal a Überraschung muas a no sei.

Bis boid. Ich gfei mi auf Eich.

Eier Mariandl

Eingetragen am 25.07.2008